Рӯйдоди таърихӣ дар рушди ҳамкориҳои фарҳангию таълимӣ
Имзои Ёддошти тафоҳум байни Консерваторияи миллии Тоҷикистон ва Консерваторияи Тянҷини Ҷумҳурии Мардумии Чин
Дар рӯзҳои охир шаҳри Тянҷин – яке аз марказҳои муҳимми илмӣ ва фарҳангии Ҷумҳурии Мардумии Чин – шоҳиди рӯйдоди назаррас гардид. Дар маросими бошукӯҳ бо иштироки роҳбарият ва устодони муассисаҳои бонуфузи таълимии мусиқии кишварҳои аъзои Созмони Ҳамкориҳои Шанхай, баҳри рушди босуботи илму фарҳанг ва ҳамкориҳои судманди дуҷонибаю бисёрҷониба дар як қатор чорабиниҳои муҳимми таърихӣ ширкат доштанд.
Ҳамзамон, дар доираи чорабиниҳои мазкур Ёддошти тафоҳум байни Консерваторияи миллии Тоҷикистон ба номи Талабхӯҷа Сатторов ва Консерваторияи мусиқии Тянҷини Ҷумҳурии Мардумии Чин ба имзо расид. Ёддошти тафоҳум аз ҷониби ректори Косерваторияи миллӣ Давлатзода Баҳодур Давлат ва президенти Косерваторияи Тянҷини Ҷумҳурии Мардумии Чин Ван Хунвэй ба имзо расид.
Маросим бо суханронии тантанавии роҳбарони ҳарду ҷониб оғоз ёфт. Ректори Консерваторияи миллии Тоҷикистон Давлатзода Баҳодур, дар баромади худ таъкид намуд, ки ин иқдом қадами муҳимме дар роҳи таҳкими робитаҳои илмӣ, фарҳангӣ ва таълимӣ миёни Ҷумҳурии Тоҷикистон ва Ҷумҳурии Мардумии Чин мебошад. Ректори Косерваторияи миллӣ афзуд, ки ҳамкориҳои нав ба рушди насли ҷавони ҳунармандон ва таҳкими заминаҳои илмӣ дар соҳаи мусиқӣ мусоидат хоҳанд кард.
Ин санади ҳамкорӣ, имкониятҳои тозаеро барои рушду тавсеаи ҳамкориҳои илмӣ ва фарҳангӣ боз мекунад. Тибқи иттилои расонаҳои чинӣ, Консерваторияи Тянҷин яке аз муассисаҳои бонуфузи кишвар ба ҳисоб рафта, таҷрибаи васеъ дар ташкил ва қабули донишҷӯёни хориҷӣ дорад.
Маросими имзои Ёддошти тафоҳум дар шаҳри Тянҷин як рӯйдоди воқеан таърихӣ ба шумор меравад. Он барои Консерваторияи миллии Тоҷикистон имкониятҳои тозаеро боз намуда, ҳамзамон Тоҷикистонро ҳамчун кишвари дорои фарҳанги ғанӣ ва ҳунари оламшумул муаррифӣ мекунад.
Ин иқдом на танҳо ба рушди санъати мусиқӣ, балки ба таҳкими дӯстии ду халқ хизмат карда сафҳаи наверо дар таърихи ҳамкориҳои фарҳангиву таълимӣ миёни Ҷумҳурии Тоҷикистон ва Ҷумҳурии Мардумии Чин боз намуд.
